कवि भूपी शेरचनले उहिल्यै एकबेला लेखे । ‘…धरान कहिले लेफ्ट गर्छ कहिले राइट गर्छ ।’ धरानको सामाजिक साँस्कृतिक र राजनीतिक चरित्रलाई देखेर यी पङ्क्तिहरू काेरिएका थिए । उपभोक्तवादी सँस्कृति हेर्दा ‘राइट’ हिँडेजस्ताे देखिने सहर भने चुनावी परिणामले सदैव ‘लेफ्ट’ शक्तिहरूलाई मात्रै मतादेश दिइरहेकाे लाग्छ । भूपू गाेरखा र सेवारत सैनिकहरू पल्टन घरमा ‘लेफ्ट राइट’ गरिरहेका हाेलान् । तर, ‘लाहुरे’ हरूकाे सहर धरान भने विगत सात वर्षयता निरन्तर दाैडिरहेकाे छ ।
विजयपुरकाे काखमा लमतन्न परिरहेको धरान उपमहानगरका मनुवाहरू प्रत्येक शनिबार दाैडिन थालेको भने सन् २०११ देखि हाे । यस्ताे, मनकारी कामका लागि साइत जुराइदिइरहने संस्था हाे – धरान रन । संस्थापक सन्ताेष राईदेखि अहिलेका अध्यक्ष रमु राईसम्म अाइपुग्दा रन कार्यक्रमले ३५० हप्ता बढी पार गरिसकेको छ । तीनकुने जङ्गलछेउमा रहेको सिरिजङ्गा मार्गकाे ३.५ किमि दूरीकाे साप्ताहिक दाैड कार्यक्रम सुरु गर्दा जम्माजम्मी ३८ जना सहभागी थिए । तर, अहिले सात वर्षको अन्तरालमा कुल ८,२०० बढी धावकहरूले याे लाेकप्रिय इभेन्टमा अाफ्नाे नाम दर्ता गराइसकेका छन् । चाहे त्यो चार वर्षमुनिका कलिला खुट्टा हुन् या ७० वर्षे वयोवृद्ध अनुहार । सबै याे सभ्य सँस्कृतिकाे बानी बसाल्ने अभियानका सारथीहरू हुन् ।
२०७४ फागुन ५ गते शनिबार धरानले २५०० बढी धावकहरूकाे सहभागितामा अाठ किलोमिटरकाे ‘छैटौं नेवा च्यारिटी धरान रन’ प्रतियोगितलाई उत्साहजनक रूपमा सम्पन्न गरिसकेको छ । अाजकाे मितिसम्म अाइपुग्दा अायाेजक संस्था ‘धरान रन टिम’काे अथक मिहिनेत, स्वयंसेवकहरूकाे समर्पण भाव, राष्ट्रिय तथा अन्तर्राष्ट्रिय ख्यातिप्राप्त एथलिट्सहरूसँगै सदैव दुगुरिरहन चाहने धरानवासीहरूकाे अथाह अाकाङ्क्षा, सहयाेगी हात र संस्थाहरूकाे एकीकृत जाेडले ‘धरान रन’ सधैं केही न केही अलग काम गरिरहने धरानेहरूकाे बेग्लै परिचय बनेको छ ।
सङ्कलित रकम सदैव सदुपयोग गर्नु कठिन हुन्छ । तर, ‘धरान रन’ यस मामिलामा मुक्त छ । अहिले पनि उठेको रकम संक्रमित बालबालिकाहरूकाे शिक्षादीक्षामा खर्चने सङ्कल्प कसेकाे छ समूहले । सडक बालबालिका र दुर्गम ठाउँमा शिक्षाकाे पहुँचकाे कुरादेखि फरक क्षमता भएका व्यक्तित्वहरूकाे सम्मान सबै असल कर्महरूमा ‘धरान रन’ निरन्तर पाइला चालिरहेकाे छ । यस्तो लाग्छ दाैडिने र दाैडाउने काम ट्रयाकभित्र र बाहिर दुवै भूमिकामा ‘धरान रन’ व्यस्त छ ।
यी असल र मनकारी मनहरूलाई साधुवाद छ । दाैडने अभियान जारी रहाेस् । धरानजस्तै अरू नगरीहरू पनि यसरी नै दाैडिरहेकाे देख्ने माैका मिलाेस् ।
